کبھی کبھی ہماری لڑائی اپنے آپ سے بھی ہوتی ہے۔ مثلاً جب کبھی ہم کوئی غلط کام کرنے لگتے ہیں توہمارے اندرسے ایک آواز اٹھتی ہے کہ یہ کام نہ کریں اس سے نقصان ہوسکتاہے۔ اسی طرح کبھی ہم کام اس لیے بھی کرتے ہیں کہ اگر ہم کسی مقصد کو پانے کے لیے آٹھ گھنٹے کام کرتے ہیں توکیوں نہ دس گھنٹے کام کیا جائے تاکہ کارکردگی مزید بہتر ہو جائے۔ کبھی بیٹھے بیٹھے ہمیں یہ بھی خیال آتا ہے کہ ہم جو کر رہے ہیں ‘ ہمیں اس سے بھی بہتر اور اچھا کرنا چاہیے۔ ہم پہلے سے زیادہ محنت کرنا شروع کر دیتے ہیں۔ کبھی کبھی ہم اپنے معمول سے اتنے تھک جاتے ہیں کہ کچھ بھی کرنے کو دل نہیں کر رہا ہوتاحتیٰ کہ ہمت ہار جاتے ہیں لیکن پھر ایک دم سے ہمارا دل اسی کام کو زیادہ جوش سے کرنے کو تیار ہو جاتا ہے اور ہم پھر ہمت پکڑ لیتے ہیں۔ جہاں تک میں نے سمجھا ہے ہم میں ہی ایک ایسا شخص بستا ہے جودرحقیقت ہمارا اصل ہوتاہے۔ اس لیے میرا یقین ہے کہ ہر فر د کے اندر ایک اچھا اور باصلاحیت انسان چھپا ہوتاہے جوتھک تو سکتا ہے مگر ہار نہیں سکتا۔ ہر ناامیدی میں امید کی کرن بنتا ہے۔ جب حالات خراب ہوں تو ہم کو حوصلہ دیتا ہے۔ ہم کو یقین دلاتا ہے کہ کوئی بھی کا م نا ممکن نہیں ہے۔ اچھا ئی اور برائی میں فرق کو واضح طور پر دیکھ سکتاہے۔ جو ہمیں حوصلہ دیتاہے اک بار اور کوشش کرکے تو دیکھو۔ ہمارے اندر کی آواز ہوتا ہے جو ہم کو بھٹکنے سے بچا لیتا ہے۔ الغرض جو تم کو تمہارے اندر چھپی بے شمار صلاحیتوں کا احساس دلاتا ہے کہ“تم یہ کر سکتے ہو” وہی اصل ہیرو ہوتاہے۔ ہم کو صرف اسے اپنے اندر سے پہچاننا ہوتا ہے اور ایسا ہی بننا ہوتاہے۔ اب سوال پیدا ہوتا ہے کہ یہ کیسے ممکن ہے؟ بہت آسان ہے صرف اپنے آپ کو پہچاننے کی کوشش کرو۔ ہم باصلاحیت ہیں‘ صرف ایک بار کوشش کرنے کی ضرورت ہے۔ دنیا میں کوئی بھی چیز بغیر مقصد کے نہیں ہوتی ۔ ایک چھوٹی سی اور عام سی مثال ہی لے لیں کہ کوڑا کرکٹ جو بظاہر ہماری نظر میں صرف اور صرف گندی کے سوا کچھ نہیں مگر وہ بھی ایندھن کے طور پر استعما ل ہوتاہے ۔ اسی طرح ہر چیز کے دنیا میں ہونے کا کوئی نہ کوئی مقصد ضرور ہے۔ ان چیزوں سے کسی نہ کسی طرح فائدہ ضرور حاصل ہوتاہے۔ مگر ہم تو الحمدللہ اشرف المخلوقات ہیں۔ صاحبِ شعور بھی ہیں۔ ہمارے پیدا کیے جانے کا بھی کو ئی نہ کوئی مقصد اور فائدہ ضرور ہے۔ ہمیں سب سے بڑا مسئلہ یہ ہے کہ ہم اپنی خودی کو پہچاننے سے قاصر ہیں۔ اللہ تعالیٰ نے ہمیں اپنی خاص نعمتوں سے نوازا ہے اور ان نعمتوں میں سب سے بڑی نعمت جس کا کوئی نعم البدل نہیں وہ یہ ہے کہ اللہ تعالیٰ نے اس کائنات کی ہر چھوٹی اور بڑی چیز ہمارے اختیار میں دی ہے۔ عقل بھی اللہ تعالیٰ کی خاص نعمت ہی ہے جس سے انسان شیر جیسے طاقتور ‘ہاتھی جیسے بڑے جانور پر قابو پا لیتا ہے اور انہیں اپنے فائدے کے لیے استعمال بھی کر رہا ہے۔ کیا ہم نے کبھی یہ غور کیا ہے کہ ہم آج تک جس سے بھی ملے ہیں اس میں کو ئی نہ کوئی انوکھی بات ضرور تھی۔ کوئی پڑھائی میں بہت اچھا تھا تو کوئی اپنے ہنر میں بلا کی مہارت رکھتا تھا۔ ہم جب بھی غور کریں گے تو ہم کو احساس ہو گا کہ جو کام ہم کو شروع شروع میں ناممکن اور مشکل لگتا تھااسے ہم مکمل کرنے کے بالکل قریب ہیں۔ ہم محسوس کرنے لگتے ہیں کہ یہ تو کوئی مشکل ہی نہ تھاایسے ہی اس کو کرنے سے ڈر رہے تھے۔ اب ایسا کیوں سوچتے ہیں؟ اس لیے کہ ہم نے کوشش کی تھی اور مستقل مزاجی اختیار کی تھی پھر ہمارے اندر سے حوصلہ اور ہمت بڑھتی رہی اور آخر ہم نے اپنے مقصد میں کا میابی حاصل کر لی۔ یعنی اس کام کو کر دکھایا۔ میرا ایمان ہے کہ ہم کسی نہ کسی صلاحیت کے مالک ضرو رہیں۔ بس اسے تلاش کیجیے اور ڈٹ جایئے کیوں کہ کامیاب انسان کی فطرت سب سے بڑا کمال یہ ہے کہ یہ تھک تو سکتا ہے مگر ہار نہیں سکتا۔

گزشتہ شب لاہور جانے کا اتفا ق ہوا۔ دوران سفر اندرون شہر ایک ٹریفک سگنل پر کھڑا ہونا پڑا۔ اس دوران ایک شخص اچانک گاڑیوں سے ٹکراتا ہوا ، گرتا، لڑکھڑاتا سڑک کے ایک کنارے تک پہنچا اور پھر کچھ دیر بعد عالم مستی میں میں چلا گیا۔ بے جا ٹریفک کی آواز، گاڑیوں کے ہارن کی کانوں کو اڑا دینے والی آوازیں بھی تھیں مگر وہ نوجوان اپنی مستی اپنی نیند میں گرتے ہی دنیا و مافیہا سے لاپرواہ اور بے خبر ہو کر گہری نیند میں چلا گیا تھا۔ ایسے “بیمارِ قوم” بڑے شہروں کی بڑی شاہراہوں کے پل کے نیچے اپنا مسکن بنائے بیٹھے ، تکیہ لگائے لیٹے رہتے ہیں۔یہی نہیں ہمارے معاشرے میں بہت سے گھروں میں ایک عد د ایسا کردار ضرور موجود ہوتاہے جسے سوائے روٹیاں توڑنے ، محلے میں لڑایاں لینے کے سوا کوئی دوسرا کام نہیں آیا۔ بعض گھروں میں فرد واحد کی کمائی اور محنت سے پورا گھر چل رہا ہوتاہے اور باقی ‘ککھ پن کے دہرا نہ کرنے’ کی پالیسی پر وقت گزار رہے ہوتے ہیں۔نہ مناسب تعلیم حاصل کر سکے اور نہ ہی کوئی ہنر سیکھ سکے۔ بوجھ بننے کی بجائے بوجھ بنتے جا رہے ہیں۔ جب کمانے والے ہاتھ کم اور خرچ کرنے والے زیادہ ہو جائیں تو کیا پھر وہاں آئے روز مہنگائی کا رونا نہیں رویا جائے گا؟ ایسا کیوں ہے؟ آخر یہ سب لوگ کیوں ‘سروائیو’ کر جاتے ہیں۔ اس کی وجہ بہت دلچسپ ہے۔ جس طرح اولاد جیسی بھی ہو ، ماں کی گود سب کے لیے یکساں ہوتی ہے۔ ہر بچے کے لیے ماں کی گود میں ایک جیسا ہی خیال اور پیار ہوتاہے ۔ بالکل اسی طرح “ریاست” کی گود میں بھی اس کا ہر باشندہ ایک جیسا ہے کہ اس میں ہر بھنگی، نشئی ، چور ، ڈاکو اور لٹیرا سما جاتا ہے۔ یہ کسی کوبھی نہیں نکلاتی بلکہ یہ ماں کی طرح انہیں پالتی رہتی ہے۔ آپ یقین کریں نہ کریں یہ کما ل صرف اور صرف “ریاست پاکستان ” کا ہے۔ اس ریاست کو گالیاں دینے والوں کو بھی یہ ریاست اپنے داماد کی طرح رکھتی اور برتاؤ کرتی ہے۔ کوئی کریمنل ، چور، ڈاکو اگر جیل میں ہویہ ریاست اسے بھی داماد کی طرح رکھتی ہے، انہیں بھی زندہ رہنے کے لیے ہر طرح کی ضروری اشیاء فراہم کرتی چلی آ رہی ہے۔ آپ دیکھ لیں حاجی، نمازی اور امام مسجد سے لے کر ظاہر و باطن بے ایمانی اور بدعنوانی کرنے والا بھی اسی ریاست میں پل رہا ہے۔ یہ ریاست اپنے ہر باشندے کو ماں کی گود کی طرح ہر قسم کا تحفظ فراہم کرتی چلی آرہی ہے۔ اس کی گود میں جہاں ‘معمار قوم’ پلے ہیں وہاں اسی ہی کی گود میں آستین کے سانپ نے بھی پرورش پائی ہے۔ چونکہ ہمارا ماننا ہے کہ یہ دنیا چند اچھے لوگوں کی وجہ سے قائم ہےتو ریاست کی گود میں بھی ایسے ایسے محب وطن ہیں جن کی وجہ سے اس کے ہر باشندے کو عزت اور مال و جان کا تحفظ مل رہاہے۔ بس دعا ہےکہ اللہ تعالیٰ ہماری اس انمول گود کو ہمیشہ آباد رکھے۔ آمین۔

یہ کہانی شاید آپ نے پہلے کہیں سے سنی یا پڑھی ہو۔ بہت چھوٹی سی کہانی ہے مگر اس کے ایک ایک لفظ میں ہماری زندگی اور دنیا کی کہانی چھپی ہوئی ہے۔ ایک صاحب نے موبائل ریپئرنگ کی دکان کھول رکھی تھی۔ رات کے دس بجے رہے تھے۔ وہ دکان بند کرنے ہی والے تھے کہ ایک گاہک آ گیا۔ اس گاہک نے موبائل آگے بڑھایا اور کہا کہ یہ آن نہیں ہو رہا۔ موبائل ریپئر کرنے والے نے موبائل ہاتھ میں لیتے ہی کہا چیکنگ فیس تین سو روپے ہے۔ گاہک راضی ہو گیا۔ ان صاھب نے موبائل کھولا اور خامی ایک نظر میں پکڑ لی۔ انہوں نے نہات پھرتی سے موبائل کے مائیک کا اسکریوڈھیلا کیا اور مائیک کو دراز میں گرادیا۔ مائیک جو ایک ننھا سا پرزا تھا ، گاہک کو کیسے نظر آنا تھا کہ کب دراز میں گرا۔ پھر ان صاحب نے موبائل کا معانہ کرتے ہوئے کہا۔ ایل سی ڈی اڑ گئی ہے۔ پاور سسٹم بیٹھ گیا ہے۔ کل ملا کر چار سے پانچ ہزار کا خرچ آئے گا۔ اتنی رقم میں بالکل نیا سیٹ بھی مل جائے گا۔یہ دیکھئے بالکل ایسا ہی سیٹ، قیمت صرف ساڑھے تین ہزار۔ چائنا کا ہے اس لیے سستاہے مگر کمال کا ہے۔ گاہک نے موبائل واپس لے لیا۔ ساڑھے تین ہزار میں نیا سیٹ خریدا چیکنگ کی فیس تین سو روپے دی۔ روپے لے کر ان صاحب نے خدا کا شکر ادا کیا کہ دکان بند کرتے کرتے بھی چیکنگ کے تین ، مائیک پانچ سو تک بک جائے گا اور ساتھ ساتھ ایک ہزار نئے سیٹ پر منافع بھی مل گیا۔ اس نے دکان بند کی اور برابر والے آصف کی دکان پر پہنچا۔ وہ دونوں ایک ہی محلے میں رہتے تھے اس لیے رات میں ساتھ ہی نکلتے تھے۔ آصف نے کپڑوں کی تہہ لگاتے ہوئے کہا ایک محترمہ نے تو آج جان کھا لی تھی۔ جو کپڑا دکھاؤ وہ اس کی سو دو سو قیمت کم لگاتی۔ بڑی مشکل سے تین سو روپے میڑ والا پانچ سو روپے میٹر تھمایا۔ دونوں نے قہقہ لگایا اور دکان کو تالا لگا کر بس اسٹاپ کی طرف چل پڑے۔ رکشے والے سے پوچھا کہ نیو کراچی چلو گے۔ رکشے والے نے ہاں میں سر ہلا کر کہا لیکن تین سو لوں گا کیونکہ آج سی این جی بند ہے رات بھی زیادہ ہو رہی ہے خالی آنا ہو گا۔ دونوں نے ایک دوسرے کو دیکھااور بڑبڑانے لگے۔ “ہر ایک نے لوٹ مچا رکھی ہے، کیا ہو گا اس ملک کا” رکشا ابھی کچھ دور ہی گیا تھا کہ دو بائیک سواروں نے انہیں روک لیا۔ پستول دکھا کر ان کے پرس اور موبائل چھین لیے ان دونوں نے اپنے خریداروں کو لوٹا تھا، رکشہ والے نے سی این جی کی بندش کے بہانے ان کو لوٹا اور ڈاکوؤں نے سرِ راہ ان تینوں کو ہر چیز سے محروم کر دیا۔جو جیسے آیا تھا ، ویسے ہی چلا گیا۔ کیا یہ سب نہیں ہو رہا، کیا اسی طرح ہر طرف لوٹ مار نہیں مچی ہوئی۔ صبح سے شام تک ہم کسی نہ کسی کو ٹھگنے میں لگے رہتے اور کوئی نہ کوئی ہمیں ٹھگنے میں لگا رہتا ہے۔ جب ہم خود ہی اپنا احتساب نہیں کر رہے ہوں گے تو وزیراعظم اناڑی ہو یا کھلاڑی کیا فرق پڑتاہے۔ ایمان اللہ رب العزت کی دین ہے، اگر اللہ کے عذاب کا مزہ چکھنے کا ڈر بھی ہمیں نہیں بدل سکا تو پھر چاہے آپ عمران خان کو چھوڑ کا طیب اردگان بھی لے آئیں ہم یوں کے توں ہی رہیں گے۔ بس پھر ہم کسی دوسرے کو لوٹتے رہیں گے اور پھر کوئی تیسرا ہمیں لوٹتا رہے گا۔

“اسامہ جب گھر سے گیا تو اس نے مجھے یہی کہا کہ میں نے ایک دوست کو چھوڑنا ہے اور’ بس چھوڑ کے میں جلدی آجاؤں گا’۔ میں نے اسے کہا کہ جلدی گھر آناٗ اس نے کہا ٹھیک ہے۔پھر میں نے 12:30پر فون کیا تو اس نے کہا میں 10 منٹ میں آتا ہوں۔ انتظار کے بعد پھر دوبارہ 1:15 پر کال کی تب وہ شاید ڈرائیونگ کی وجہ سے کال اٹھا نہیں رہا تھا۔ پھر 1:30 پر دوبارہ فون کیا تو فون بند جا رہا تھا۔ پھر 4 بجے ایک ایس ایچ او کا فون آتا ہے کہ اسامہ کے والد سے بات کروائی جائے جب کروائی گئی تو انہوں نے بتایا کہ پولیس مقابلہ ہوا تھا، فائرنگ ہوئی ہے اور آپ کے بچے کو گولی لگ گئی ہے وہ پمز ہسپتال ایمر جنسی میں ہے آپ وہاں پہنچیں۔ہم مطمئن تب ہوں گے جب ہمیں انصاف ملے گا۔ پاکستان میں بہت جے آئی ٹی بنتی ہیں۔ بچوں کو مار کر یہ پولیس ان پر اور کیس ڈال دیتی ہےاور اپنے آپ کو چھپا لیتی ہے۔ اپنی نوکریاں بچا لیتی ہے۔ میرا اسامہ بہت معصوم بیٹا تھااس کو انہوں نے جانوروں کی طرح مارا ہے ۔ اس کا سینہ چھلنی چھلنی کر دیا ہے۔ انہوں نے نہیں سوچا کہ اس کی ماں ہو گی، اس کا باپ ہو گا۔ ہماری کتنی امیدیں اور خواہشیں وابسطہ تھیں اس سے مگر انہوں نے کس طرح اسے ذبح کر دیا۔عمران خان کہتے ہیں کہ یہ مدینہ کی ریاست ہے۔ کیا مدینہ کی ریاست ایسی ہوتی ہے؟” یہ الفاظ چار روز قبل پولیس کے ہاتھوں قتل ہونے والے اسامہ ستی کی والدہ کے ہیں۔ پولیس کے بارے جو اس دکھیاری ماں نے اظہار کیا ہے یہ کوئی نئی بات نہیں رہی۔ ایک عام شہری کے لیے ریاست ماں کا درجہ رکھتی ہے اور جب ریاست کے محافظ ہی ریاست کے بچوں پر ظلم ڈھانے شروع کر دیں گے تو وہ دن دور نہیں جب ہر ماں کو اپنا لختِ جگر کھونے میں دیر نہیں لگے گی۔ یو اے ای اور سعودیہ جیسی ریاست میں سخت ترین قوانین ہونے کے باوجود بھی پولیس بڑے سے بڑے مجرم کا پیچھا ہیلی کاپڑ سے تو کر سکتی ہے مگر گولیاں نہیں مارتی۔ چلیں اسامہ کے والد کے موقف کے مطابق یہ بات مان بھی لیں کہ اسامہ کا پولیس والوں سے ایک دو دن پہلے جھگڑا ہو گیا تھا کیا تب بھی رنجش اتنی زیادہ تھی کہ کسی کی جان لے لی جائے۔ کیا یہ سیدھی سیدھی ریاستی دہشت گردی نہیں۔ جس طرح ریاست ِ امریکہ اسامہ بن لادن کی دشمن بنی ہوئی تھی کیا اسی طرح ہمارے ریاست بھی اسامہ ستی سے اتنی ہی خفا تھی اس کی جان ہی لے لی جائے۔ آپ یقین کریں یا نہ کریں مگر یہ حقیقت ہے کہ دوسرے ممالک میں پولیس اور سکیورٹی کے اداروں کی وجہ سے عام آدمی خودکو محفوظ ترین سمجھتا ہے مگر ہمارے ملک میں عام اور شریف آدمی اگر کسی سے سب سے زیادہ خوف زدہ ہے تو وہ پولیس ہے۔ کیایہ سب ان کی تربیت کا فقدان ہے یا ان سے بھی کوئی پوچھنے والا نہیں ہے۔ جہاں بھرتیاں رشوت اور ایک عدد فون کال پر ہوں گی وہاں کیسے ممکن ہے کہ یہ سب تماشہ نہ ہو۔ ایسا نہیں ہے کہ سب محکمے غلط اور کرپٹ ہیں ، پولیس ہی کے محکمہ میں بہت بہتری بھی آنے لگی ہے جہاں کہیں میرٹ پر نوجوان پڑھی لکھی نسل آفیسر بننے لگی ہے۔ مگر اصل مسئلہ “جڑ” کا ہے وہ جڑ جو صدیوں سے ہمارے سیاستدانوں اور وڈھیروں سے جڑی ہیں۔ ان کا اثر رسوخ مدتوں سے چل رہا ہے بس کہیں نہ کہیں جا کر ایک ایماندار آفیسر بھی بے بس ہوتا نظر آتا ہے۔ ہم آخر یہ فیصلہ کیوں نہیں کر لیتے کہ ہمارے لیے ہر عام آدمی کا مبینہ قصور بھی امریکہ کے مطابق اسامہ بن لادن سے کیوں بڑا ہو جاتا ہے ۔ سڑک پہ کھڑا ہوا عام سپاہی بھی کس طرح یہ فیصلہ کر سکتا ہے کہ جعلی پولیس مقابلہ کر کے میں ریاست میں انصاف کی رٹ قائم کر سکتا ہوں۔کاش ہمیں ہی سمجھا دے کوئی !

قدرت کا تو پتہ نہیں مگر پاکستان میں کچھ ویل ٹرینڈ گروپس اپنے ویل ٹرینڈ لوگوں کے ذریعے آپ کو ہر نئے روز امیر ہونے کا پورا پورا موقع فراہم کرتے ہیں۔ پتہ نہیں کیا مسئلہ ہےآپ لوگ کیوں ان پر یقین نہیں کرتے۔ یہ گروپس یہ لوگ بلکہ یہ باقاعدہ نیٹ ورکس وہ ہیں جو آپ کو موبائل پر ایس ایم ایس اور کالز کے ذریعے بتاتے ہیں کہ فلاں ٹی وی کے پروگرام جن میں سرفہرست “پاکستان جیتو” اور ان سے بھی زیادہ مشہور “بے نظیر انکم سپورٹ پروگرام” وغیرہ کے حوالے سے آپ کو لاکھوں روپے، ڈیڑھ تولہ سونا اور ساتھ ایک عدد کار نکلی ہے۔ بس جلدی کیجیے اور دیے گئے متعلقہ نمبر پر اتنے روپے کا ایزی پیسہ یا لوڈ کروادیں تا کہ آپ کی فائل آخری مرحلے کے لیے بھیجی جائے۔ ایسی صورتِ حال میں ہم میں کچھ زیادہ سیانے لوگ بھی ہوتے ہیں۔ جن کو امیر ہونے کی غالباً ہم سے بھی زیادہ جلدی ہوتی ہے۔ میسج دیکھتے اور اس طرح کی پر اسرار کال سنتے ہی پر جوش کچھ زیادہ ہی ہو جاتے ہیں اور بنا تحقیق کیے جیسے کال والے نے ہدایات جاری کی ہوتیں ہیں ویسا کرنے دوڑ نے لگتے ہیں جیسے واپسی اسی برینڈ نیو کار پہ ہو گی جس کی کال پہ اطلاع دی گئی تھی۔یہ لوگ اسی لالچ میں فوری ردِ عمل دکھائیں گے اور اپنے جیب سے مزید پیسے بتائے ہوئے نمبر پر ایزی پیسہ یا بیلنس کی شکل میں کروا بیٹھیں گے۔کیو ں کہ اس وقت ان سیانے لوگوں کی خوشی کے احساسات ہی کچھ اور ہوتے ہیں۔ شاید اتنی روحانی خوشی مقبوضہ کشمیر والوں کو آزادی ملنے پر نہ ہو جتنی اس وقت یہ لوگ محسوس کر رہے ہوتے ہیں۔اس وقت ایک لمحے کے لیے خوابوں کی دنیا میں چلے جاتے ہیں اور ہمارے دماغ میں حقیقت کو سمجھنے کی بجائے لاکھوں روپے، سونا اور کار کے خیالات ابال کھا رہے ہوتے ہیں۔اس طرح جو کچھ جیب میں ہوتا ہے وہ بھی گنوا بیٹھتے ہیں۔ سوال یہ پیدا ہوتا ہے کہ ہم نے اس طرح کی بے شمار فراڈ والی کہانیاں سنی ہوتی ہیں مگر پھر بھی ہم ایک میسج یا کال آنے پر اتنی جلدی یقین کیوں کر لیتے ہیں۔اس کی شاید دو بڑی وجوہات ہیں جن میں پہلی ‘لالچ’ اور دوسری یہ کہ ہم ہر کام میں جلدی کرنا چاہتے ہیں اور چونکہ جذبات ہماری طبیعت کا حصہ ہیں اس لیے جذباتی اور جلدی کی کیفیت میں ہم بعض اوقات کسی بھی معاملے کی تحقیق کرنا بالکل بھی گوراہ نہیں کرتے اور بھاری نقصان اٹھا لیتے ہیں۔یہی وجہ ہے کہ یہ منظم نیٹ ورک جو پورا پورا ویل ٹرینڈ لوگوں کے ایک خاص گروہ پر مشتمل ہوتا ہے یہ ہماری لالچی عادت، ہر کام میں جلدی اور ہمارے تجسس سے بھر پور فائدہ اٹھاتا ہے۔ اب آخر میں ایک فکری سوال کرنا چاہوں گا شاید اس سے کسی کا بھلا ہو سکے: ایک مزدور جسے سارا دن سخت محنت و مشقت کے بعد محض 600روپے دیہاڑی ملتی ہےوہاں یہ کیسے ممکن ہے کہ آپ نے کیا بھی کچھ نہ ہو حتی کہ کبھی میسج تک بھی نہ کیا ہوتو آپ کو کون اور کیسے لاکھوں روپے مفت میں دے سکتا ہے؟ سوچیئے گا ضرور!!!

وقت کسی کا انتظار نہیں کرتا۔ یہ اپنی رفتار سے چلتا رہتا ہے۔ جو لوگ وقت کی قدر کرتے ہیںاور اس کا درست استعمال کرتے ہیںہمیشہ وہی کامیا ب ہوتے ہیں۔ جو لوگ وقت کی ناقدری کرتے ہیںاور اسے ضائع کرتے ہیںیا اس کا صحیح استعمال نہیں کرتے ہمیشہ خسارے میں رہتے ہیں۔ وقت برف کی طرح ہوتاہے۔ جس طرح برف کو اگر استعمال میں نہ لایا جائے تو پگھل کر ضائع ہوجاتی ہے اس طرح وقت کو بھی اگر استعمال میں نہ لایا جائے تو یہ بھی ضائع ہوتا چلا جاتاہے۔ پوری کائنات کا نظام اور اس کا ہر ذرہ پابندی وقت کا داعی ہے۔ ایک ننھے پودے سے لیکر اس کے درخت بننے تک‘ طلوع آفتاب سے غروب آفتاب تک اور رات دن کے تبد ل میں پابندی وقت عیاں ہوتی ہے۔ پابندی وقت تمام پیغمبروں کا شیوہ بھی رہا ہے۔ ہماری ہر قسم کی کامیابی کا تمام تر انحصار بھی وقت کی پابندی ہی سے ہے۔ اگر ہم اپنے آپ کو وقت کا پابند رکھتے ہیںاور جو کام جس وقت کرنا ضروری ہو اسے اسی وقت ہی بہتر طریقے سے کرنے سے بہتر نتائج لے سکتے ہیں۔ اپنے بیرونِ ملک کے قیام کے دوران میرے دوسرے مشاہدات میں سے ایک مشاہدہ یہ بھی ہے کہ میں نے جس کمپنی کو بہتر اور اعلیٰ کارکردگی کا حامل پایا۔ اس کے تمام سربراہ سمیت ملازمین کو وقت کا پابندبھی پایا۔ میں پابندی وقت سے زیادہ ترتیب وقت (ٹائم مینجمنٹ) کا حامی ہوں۔ میں سمجھتا ہوں کہ ہماری آج کی نوجوان نسل کو وقت کی پابندی سے زیادہ وقت کے صحیح استعمال(ترتیب وقت) کی سمجھ لینے کی ضرورت ہے۔ میرا مقصد بھی یہی سمجھانا ہے کہ وقت کو کس طرح سے درست طریقے سے استعمال میں لایا جائے۔ یعنی ہم اسے کہاں گزارتے ہیں؟ کیا ہم اسے واقعی صحیح استعمال کررہے ہیں؟ اس کو کس طرح صحیح استعمال میں لاناہے؟ چند تلخ حقائق کیا کبھی آپ نے غور کیا ہے کہ ہم اپنا زیادہ تر وقت کن چیزوں یا سرگرمیوں میں گزارتے ہیں؟ہم اپنااکثر وقت غیر ضروری کاموں میں گزارتے ہیں مثلاً نمبر۱۔ کوئی سے چار دوستوں کا کسی سڑک کے کنارے بیٹھ کر گھنٹوں بے مقصد گپیں ہانکنا۔ نمبر۲۔ بازاروں کے موڑ پر کئی کئی گھنٹوں تک بغیر کسی خاص مقصد کے کھڑے رہنا۔ نمبر۳۔ فلموں اور ٹی وی کی دنیا کا اتنا شوقین ہونا کہ وقت کی کثیر مقدار اس میں ضائع کر دینا۔ نمبر۴۔ رات گئے تک بغیر کسی کام کے آوارہ گردی کرنا۔ نمبر۵۔ انٹرنیٹ پر سوشل میڈیا یعنی فیس بک وغیرہ جیسی دیگر چیزوں کااور ضرورت سے زیادہ استعما ل کرنا۔ نمبر۶۔ موبائل فونز کا زیادہ دیر تک اور غیر ضروری استعمال کرنایعنی ایس ایم ایس کرتے رہنا۔ ایک سوال کیا آپ یہ سمجھتے ہیں کہ کوئی شخص بالخصوص اگر وہ طالب علم ہو اور وہ اس طرح فضول وقت کے ضیاع میں مصروف رہے گا تو وہ بہتر کارکردگی دکھا پائے گا؟ یاد رکھیں سال میں درحقیت ایک دن ہی ہوتا ہے جو ”آج“ کا ہوتا ہے اور اسی دن میں وقت کا صحیح استعمال کرنا ہوتاہے۔ اسی دن میں کی گئی محنت ہی تم کو سرخرو کرے گی اور یہی موجودہ وقت کا صحیح استعمال ہے جبکہ ہم گزرے ہوئے اور آنے والے کل کے بارے میں کچھ بھی نہیں کہہ سکتے۔ اس لیے جو ”آج“ کی شکل میں ہم کو وقت ملا ہے اسے ہی صحیح استعمال میں لانا ہوگا۔ اگر ہم آج کا دن گزرے ہوئے کل کی شکایتیں کرنے میں لگا دیں گےتو آنے والے کل کے لیے کچھ بھی بہتر نہیں کر پائیں گے۔

کچھ لوگ با صلاحیت اور ہنر مند ہوتے ہیں، مگر اپنی زندگی کا نصب العین اور مقاصد کا تعین نہیں کرتے۔ کھلی آنکھوں سے کامیابی کا خواب دیکھتے ہیں اور تصورات میں لطف لیتے رہے ہیں مگر عمل کی دنیا میں سستی اور کاہلی کا شکار ہو جاتے ہیں۔ یہ بیماری ان کے لیے اور ان کی ترقی و کامیابی کے لیے بہت سی مشکلات پیدا کر دیتی ہے۔ آج سے ٹھیک ایک سال پہلے بالکل اسی طرح سال کے پہلے دن کو ہم نے گرم جوشی ، جذبے اور ولولے سے خوش آمدید کہا تھا۔ نئے خواب، نئے منصوبے تھے۔ ہم یہ سوچ رہے تھے کے اس سال 2020 میں ہم نے یہ بھی کرنا ہے ، وہ بھی کرنا ہے۔ پھر کچھ یوں ہوا، فضا بدلی، حالات بدلے “کرونا “پاکستان میں داخل ہوا اور ہماری معیشت سے ہوتا ہوا ہمارے حواص پہ سوار ہو گیا۔ ہم میں سے بہت لوگوں نے بہت کچھ کھو دیا ۔ہم میں سے ہی بہت سے لوگ تھے جنہوں نے یہ سوچتے سوچتے 2020 کا پورا سال ضائع کر دیا کہ آج کچھ کرتے ہیں کہ کل کچھ کرتے ہیں۔ کاہل سال بھر کاہل رہے، سست سال بھر سست ہی رہے۔پورا 2020 کا سال ہم نے اس انتظار میں گزارا کہ کوئی خضر آئے گا ۔ بس وہ دن قریب آنے والا ہے کہ ہمارا وزیراعظم اپنے ہاتھوں سے نوالہ کھلائے گا۔ حکومت 12000 نہیں 24000روپے ہم نوجوانوں کا پکا پکا وظیفہ قائم کر دے گی بلکہ یوں کہیے کہ گھر ویلے بیٹھنے کی وجہ سے ہماری پینشن مقرر کر دے گی جس سے ہم بغیر کچھ کیے مزے سے یہ سال گزار لیں گے۔ پھر ہو ا کیا پینشن آئی نہ مزے آئے، ہاں سال ضرور گزر گیا کیو ں کہ اسے گزرنا ہی تھا۔ہم کسی بھی سال کے شروع ہونے سے پہلے اپنے آپ سے کتنے عہد کرتے ہیں ، توبہ کرتے ہیں ، استغفار کرتے ہیں کہ اگلے سال کچھ غلط نہیں کرنا بس ناک کی سیدھ میں زندگی گزارنی ہے۔ پھر اچانک دسمبر آجاتا ہے اور اگر کبھی ہم خواب غفلت سے جاگ ہی جائیں تو بس ہلکا سا جھٹکا محسوس ہوتا ہے کہ اف یار یہ سال بھی گزر گیا اور کچھ نہیں کر پایا۔سوال یہ پیدا ہوتا ہے کہ ہم کب تک “کرونا ” کی آڑ میں چھپے رہیں گے۔ ہم کب تک “اب کروں گا” یا”تب کروں گا” کی ناکام پالیسی پر رہیں گے؟ ہمیں اس دائرے سے باہر آنا ہوگا۔ عہد نہیں کوشش کرنا ہو گی۔ ہم اپنے گناہوں اور سست پن سے استغفار کیوں نہیں کر لیتے تا کہ کچھ نیاکچھ خاص کرنے کے لیے تیار ہو سکیں۔ آخر میں حضرت علی (رضی اللہ تعالیٰ عنہ) کا قول مبارک پیش کرنا چاہوں گا، شاید یہ الفاظ ہمارے دل میں اتر کر ایسی تاثیر پیدا کر سکیں کہ اپنے آپ کو روحانی اور دنیاوی حوالے سے بدل سکیں۔ “خبر دار اللہ کے بندو!جب تک گلا گھٹنے میں مہلت ہے روح قید نہیں کی جاتی، عقل سلامت ، بدن میں آرام، حواس درست ارادہ موجود، توبہ کرنے کی فرصت ، گناہ سے پہلے غائب منتظر کے آنے اور اللہ تعالیٰ باقدرت کے حکم ِ فنا جاری ہونے تک توبہ کر لے۔”

پنجاب کا ایک شہر اور ضلع ساہیوال سے بیس میل کے فاصلے پر مین ریلوے لائن پر دریائے راوی سے کچھ فاصلے پر دوآبے کے دامن میں واقع ہے۔ لاہو ر سے 110کلو میٹر کے فاصلے پر ہے۔ قدیم زمانے سے قافلے اس بستی کے قریب سایہ دار درختوں میں سستانے کے لیے قیام کیا کرتے تھے۔ درختوں کا یہ جھرمٹ ”اوکاں والا“ کہلانے لگا۔ وقت کے ساتھ سا تھ بستی پھیلتی گئی اور اوکاں والا رفتہ رفتہ اوکاڑا بن گیا۔ انگریزوں کے عہد میں زرعی اہمیت کے پیس نظر اس بستی کو باقاعدہ طور پر آباد کرنے کی منصوبہ بندی ہوئی اور ایک باقاعدہ نقشے کے مطابق لال اینٹوں کا ایک شہر ابھرکر سامنے آیاجسے اے ، بی ،سی ڈی ای اور ایف بلاکوں میں تقسیم کیا گیا۔چار بڑے بازار بنے۔ ایک کا رخ ریلوے اسٹیشن کی جانب تھا اس لیے ریل بازار کہلاےا۔ ایک کا نام ہسپتال بازار، ایک کا رخ کچہری کی جانب تھا اس لیے کچہری بازار کا نام دیا گیا۔ چوتھا بازار چھاﺅنی کے رخ پر بنا اور صدر بازار کہلایا۔ چاروں بازار کے وسط میں چوک کا نام ”گول چوک“ رکھا گیا۔ 1852 میں اس کا ضلع گوگیرہ تھا۔مین بازار گول چوک (گول مسجد) صدر بازار، کچہری بازار، ہسپتال بازار، صمد پورہ بازار، ریلوے بازار، فوارہ چوک، گلہ منڈی، سبز منڈی، آٹو مارکیٹ یہاں کے تجارتی مراکز ہیں۔ گورنمنٹ کالونی، چوہدری کالونی، محلہ فیض آباد، فاروق آباد، اللہ داد کالونی، گارڑن ٹاؤن، غفور کالونی، مدینہ ٹاؤن سوسائٹی، کریم ٹاؤن، سیٹھ کالونی، فتح کالونی، عامر کالونی، رحمت پور، مصیبت پورہ، اسلام پورہ، شفیق ٹاؤن، پیپلز کالونی اور حسن پورہ وغیرہ یہاں کی رہائشی بستیاں ہیں۔ جب لاہو راور ملتان کے درمیان ریلوے لائن بچھائی گئی تو 1864 میں ضلع صدر مقام منٹگمری (ساہیوال) منتقل ہوگیا۔محمد طاہر حسین قادری ماہنامہ “آئینہ کرم” میں لکھتے ہیں: سنہ 1915تک مختلف انتظامی تبدیلیوں کے بعد یہ ضلع تحصیل پاکپتن، تحصیل اوکاڑا، تحصیل دیپالپور اور تحصیل منٹگمری کی شکل اختیار کر چکا تھا۔ستمبر1893میں نوٹیفائیڈایریااور 1930 میں میونسپل کمیٹی کا درجہ دیا گیا اس وقت اس قصبے کا رقبہ تقریباًسوا دو مربع میل تھا۔ آبادی دولاکھ سے تجاوز کر چکی تھی۔1982 میں ضلع کا درجہ دیا گیا۔ شروع میں محض دو تحصیلیں اوکاڑا اور دیپالپور تھیں، بعد میں رینالہ خورد کو تیسری تحصیل بنا دیا گیا۔ اس ضلع کے شمال مشرق میں ضلع قصور اور مغرب میں ضلع ساہیوال ہے۔ شمال مغرب میں دریائے راوی کے پار ضلع ننکانہ صاحب اور ضلع فیصل آباد واقع ہیں۔ دریائے ستلج کے اس پار اوکاڑا کی حدیں ضلع بہاولنگر اور ہمسایہ ملک بھارت سے ملتی ہیں۔

میرا تعلق ضلع اوکاڑا سے ہے۔ ٹیچنگ میں دس سالہ تجربہ ہے اور ایک کتاب کا مصنف بھی ہوں۔ آج کل سکولوں اور تعلیمی حالات سے آپ سب واقف ہیں۔ کسم پرسی کا عالم ہے۔ مجھ جیسے بہت سے نوجوان جو پرائیویٹ اداروں میں کئی سالوں سے مختلف نوکریاں کر رہے ہیں، کچھ اساتذہ کے فرائض بھی سر انجام دے رہے ہوں گے۔ آمدن کم اور وقت کے ساتھ ساتھ خرچے زیادہ ہونے کی وجہ سے مختلف مسائل کا شکار ہو رہے ہیں۔ یہ نا حل ہونے والے مسائل نوجوان نسل کو مایوسی کی اندھیر نگری میں لے جا رہے ہیں۔ جس سے ہمیں بد قسمتی سے آئے روز خود کشی جیسے ناقابل معافی گناہ کرتے ہوئے لوگوں کے قصے سننے کو ملتے ہیں۔ ہمارے اخبارات ان قصوں سے بھرے پڑے ہوتے ہیں۔آج کا پڑھا لکھا نوجوان کچھ کہنا چاہتا ہے۔ وہ نہ صرف اپنے دل کا بوجھ ہلکا کرنا چاہتا ہے بلکہ اپنے تلخ تجربات سے جو کچھ اس نے سیکھا ھے وہ دوسروں کو بتانا چاہتا ہے۔مجھ جیسے کئی نوجوانوں کو جو اس ملک کی حقیقی ترقی کے لیے کچھ کرنا چاہتے تھے مگر ان کی کوئی آواز نھیں بن رہا تھا ۔ہمیں اپنے ملک کو کوئی دھکا نہیں لگانا، میرا ماننا ہے اگر ہم سب صرف اور صرف اپنے اپنے گھروں کے حالات بدل ڈالیں، یوں محلہ، گاؤں ، شہر، صوبہ اور پھر پورا ملک بدل جائے گا۔ تبدیلی ہم سے شروع ہو گی جس کے لیے صرف سوچ تبدیل کرنا ہو گی۔ شاید ہم سب ایسا کرنا چاہتے تھے اور کرنا چاہتے ہوں گے مگر کسی نہ کسی پلیٹ فارم کا انتظار تھا۔ جو آسان اور سہل ہوتا۔ جس تک ہر خواص و عام کی رسائی ہوتی۔ وہ باآسانی اپنے نطریات کا اظہار کر سکتا۔مندرجہ بالا تمام حقائق کی روشنی میں میں نیوز فلیکس کا بے حد مشکور ہوں کہ نیوز فلیکس کی ٹیم نے ہمیں ایسا پلیٹ فارم دے رہی ہے جس کی ہمیں مدتوں سے تلاش تھی ۔ جس کے ذریعے ہم اپنی مثبت سوچ دوسروں تک پہنچا سکیں گے۔اس لیے تمام پڑھنے والے قارئین سے گزارش ہے کہ اس پلیٹ فارم کو جوائن کریں اور کہہ دیں جو کہنا چاہتے ہیں، ہو سکتا ہے آپ کے الفاظ کسی کے دل میں اتر جائیں اور یہ بھی ہو سکتا ہے کہ آپ اس طرح کسی ضرورت مند کی آواز بن جائیں۔ ویسے آپس کی بات ہے اس سودے میں برائی ہے ہی کیا کہ آپ اپنی مثبت سوچ سے اپنے عظیم ملک کی خدمت بھی کرتے رہیں اور بدلے میں آپ کو عزت اور روزگار بھی ملتا رہے۔میں ذاتی طور پر اللہ تعالیٰ کی ذات کےبعد نیوز فلیکس کی ٹیم کا شکر گزار ہوں کہ اگر یہ اتنا سا بھی سہارا نہ ملتا تو شاید میرے یہ جذبات اور الفاظ میرے اندر ہی اٹکے رہ جاتے۔