موت کی دہلیز (بڑھاپا)
تحریر :انورملک
دھندلاتی آنکھوں کا ساحل ,
ساحل پہ ڈوبتی تحریریں ,
تحریروں سے مٹتے الفاظ,
لفظوں کی ڈبڈباتی سانسیں,
سانسوں کی لرزشیں ,
لرزشوں کی اساس پہ لڑکھڑاتی ٹانگیں,
ٹانگوں کی ناتوانیاں ,
ناتواں ستونوں پہ بدن کی کوہِ گرانیاں ,
بوجھ ہستی سے جھکتی گردنیں ,
گردن پہ جھولتے سر,
سروں کے صحرا ,
صحراؤں کی وحشتیں ,
وحشتوں کے سراب,
سرابوں کے فریب,
فریبوں میں الجھی زلفیں,
زلفوں میں چمکتی چاندیاں ,
چاندی کی سفیدیاں,
سفیدیوں میں رنگے چند بالوں کے تار ,
تاروں کی شکستگیاں,
شکستہ حالوں کی بےنوائیاں ,
بے نواؤں کی سماعتیں ,
سماعتوں کی غنودگی ,
غنودگی کے خواب,
خوابوں کی تعبیریں ,
تعبیروں کی تصویریں ,
تصویروں میں جھریاں ,
جھریوں کا ساگر ,
ساگر کی گہرائیاں ,
گہرائیوں میں ڈوبا ماضی ,
ماضی میں دفن کہانیاں ,
کہانیوں کے عنوان,
عنوانوں کے خاکے ,
خاکوں کے رنگ ,
رنگوں میں رنگی صبح ,
صبح کا نور بچپن ,
بچپن کی معصوم پہلیاں ,
پہلیوں کی الجھنیں ,
الجھنوں میں الجھی جوانیاں,
جوانی کے غم ,
غموں کی بے قراریاں ,
بےقراریوں میں لذتیں ,
لذتوں کی شامیں,
شاموں کا سایہ,
سایے کا سندیسہ
بڑھاپا …..بڑھاپا
ہر ہر شے زبان حال سے پکار پکار کر کہہ رہی ہے کہ
بڑھاپا ….بڑھاپا …..بڑھاپا ……موت کی دہلیز ……بڑھاپا
