بینک سے لیا گیا قرض واپس ادا نہ کرنے پر سنی دیول کا گھر نیلامی کیلئے پیش
بھارت کے ریاستی بینک آف بروڈا نے واجبات کی عدم ادائیگی پر سنی دیول کا ممبئی کے علاقے جوہو میں واقع گھر نیلامی کیلئے پیش کردیا ہے۔
بینک آف بروڈا نے اتوار کو ایک نوٹس میں کہا تھا کہ سنی دیول کی جانب سے 56 کروڑ روپے کا قرض لیا گیا تھا جو تاحال واپس نہیں کیا گیا، اسی لیے جوہو میں واقع اداکار کے بنگلے کی نیلامی اگلے ماہ کی جائے گی۔
اخبار میں جاری کردہ نوٹس کے مطابق بنگلے کی نیلامی 25 ستمبر کو ہوگی اور بولی 22 ستمبر تک جمع کروائی جاسکتی ہے۔
نوٹس میں یہ بھی بتایا گیا ہے کہ اگر سنی دیول اپنی جائیداد کو نیلام ہونے سے بچانا چاہتے ہیں تو وہ واجبات فوری طور پر ادا کر دیں ورنہ کوئی صورت نہیں ۔
بھارتی میڈیا کے مطابق جب سنی دیول سے اس حوالے سے بات کرنے کے لیے رابطہ کیا گیا تو انہوں نے کوئی تبصرہ کرنے سے گریز کیا اور خاموشی اختیار کی۔
