بگ باس کی ایک کروڑ کی آفر ’پان‘ نہ ملنے کی وجہ سے ٹھکرا دی: رؤف لالا
رؤف لالہ نے بتایا کہ انڈین لافٹر چیلنج کے ساتھ میرا ڈیڑھ سال کا معاہدہ تھا، اسی دوران مجھے پروڈکشن کی جانب سے بگ باس کی بھی پیشکش کی گئی تھی، جب میں نے سوال کیا تو پتہ چلا اس شو کیلئے مجھے بگ باس گھر میں 3 سے ساڑھے 3 مہینے رہنا ہوگا، وہیں سب کچھ دیا جائے گا، میں نے ان سے پوچھا اس گھر میں پان ملیں گے؟ تو ان کا جواب’ نہیں‘ تھا جسے سن کر میں نے بھارت کے ایک کروڑ روپے کی آفر ٹھکرادی تھی جو آج 3 کروڑ بھارتی روپے سے بھی کہیں زیادہ بنتی ہے۔
کامیڈین کا کہنا تھا کہ بگ باس میں اس وقت پان تو نہیں ملتے تھے لیکن اب سنا ہے بگ باس میں جوس کے ڈبے میں’سب‘ ملتا ہے۔
رؤف لالہ نے اپنی پان کی عادت پر بات کرتے ہوئے بتایا کہ میں 40 سال سے ایک ہی دکان اور ایک ہی کاریگر کے ہاتھ کا بنا ہوا پان کھا رہا ہوں، وہ روزانہ 12 پان میرے لیے بناکر رکھتا ہے، مجھے پان کا نشہ ہے کسی سے بھی مانگ کر پان کھا لیتا ہوں، شادی کے وقت بھی جب میری تحقیقات کی گئیں تو ان میں یہی پتہ لگا تھا کہ میں پان بہت کھاتا ہوں۔
