اس وقت جبکہ نو منتخب امریکی صدر جو بایئڈن اپنی سرکاری رہائش گاہ میں منتقل ہونے کی تیاری کر رہے ہیں، بعض سیکورٹی ماہرین نے ان کی سائیکل کو وائٹ ہاؤس کے لئے “خطرناک” قرار دیتے ہوئے مشورہ دیا ہے کہ وہ اسے اپنے ساتھ لے کر نہ جائیں تو بہتر ہے _دراصل یہ ایک ساکن ورزش کا سائیکل ہے جسے امریکی کمپنی “پیلٹون” نے تیار کیا ہے _تاہم دوسری ساکن ورزش کے سائیکلوں کے مقابلے میں یہ بہت جدید ہے _کیونکہ اس میں ایک عدد ایل سی ڈی سکرین کے علاوہ ایک ایک ڈیجیٹل کیمرا بھی نصب ہے اور یہ سب چوبیس گھنٹے انٹرنیٹ سے منسلک رہ سکتے ہیں_خطرناک بات یہ ہے کہ اگر اس سائیکل کو “آف” بھی کر دیا جائے تب بھی یہ اپنا انٹر نیٹ کنکشن برقرار رکھتی ہے_اگر چہ وائٹ ہاؤس میں دیگر حفاظتی اقدامات کے ساتھ ساتھ سخت سائبر سیکورٹی کا بھی اہتمام کیا جاتا ہے _جس میں فائر والز اور مداخلت سے بروقت خبردار کرنے والے سافٹویئر وعیرہ شامل ہیں، لیکن سائبر سیکورٹی ماہرین کا کہنا ہے کہ ایک ماہر ہیکر ان رکاوٹوں کو بآسانی عبور کر سکتا ہے _وائٹ ہاؤس کے نیٹ ورک میں داخل ہونے کے لئے انٹرنیٹ سے منسلک یہ ساکن ورزشی سائیکل ایک اچھا انتخاب ثابت ہو سکتی ہے جس سے نہ صرف وائٹ ہاؤس بلکہ شاید پورے امریکہ کی سلامتی بھی خطرے میں پڑ جائے _بچاؤ کی ایک صورت تو یہ ہے کہ سائبر سیکورٹی سروس کو چوبیس گھنٹے تعینات رکھا جائے کہ وہ بطور خاص اس سائیکل کے کنکشن پر نظر رکھے، جبکہ دوسری صورت یہ ممکن ہے کہ وائٹ ہاوس منتقل کرنے سے پہلے اس سائیکل میں سے سکرین، کیمرا اور انٹرنیٹ کنکشن نکال دئیے جائیں تاکہ یہ خطرہ باقی نہ رہے _