لاہور – پاکستان میں جمہوریہ ترکی کے سفیر عزت مآب مہمت پیکی کے ساتھ ایک خصوصی ملاقات میں صدر آئی ایل ایم ٹرسٹ/یو ایم ٹی ابراہیم حسن مراد نے ترک نوجوانوں کے لیے 10 لاکھ ڈالر مالیت کے تعلیمی وظائف کا اعلان کیا۔
ملاقات کے دوران یو ایم ٹی کے صدر ابراہیم مراد نے استنبول میں ہونے والے حالیہ دہشت گردانہ حملے کی مذمت کرتے ہوئے مزید کہا کہ پاکستانی قوم اس سانحے کی گھڑی میں اپنے ترک بھائیوں کے ساتھ یکجہتی کا اظہار کرتی ہے۔ حسن مراد نے ملک کو ترقی کی راہ پر گامزن کرنے کے لیے ترک حکومت کی کوششوں کو سراہا۔ انہوں نے کہا کہ پاکستانی اور ترک عوام بھائیوں کی طرح ہیں اور پاکستان تمام تر مشکلات کے باوجود اپنے ترک بھائیوں کے ساتھ کھڑا رہے گا۔
حسن مراد نے کہا کہ ترک نوجوانوں کی تعلیم اور استعداد کار بڑھانے کے لیے اسکالرشپ کے اعلان کے علاوہ، یو ایم ٹی ترکی کے طلباء اور اساتذہ کو اعلیٰ تعلیم اور تحقیق کے لیے ہمیشہ خوش آمدید کہے گا۔
عزت مآب مہمت پیکی نے یو ایم ٹی کی تعلیمی کاوشوں کو سراہا اور اسکالرشپ کی فراخدلانہ پیشکش پر صدر یو ایم ٹی کا شکریہ ادا کیا۔ انہوں نے مزید کہا کہ یو ایم ٹی جیسے اعلیٰ تعلیمی ادارے قوم کی تعمیر میں کلیدی کردار ادا کر رہے ہیں۔ سفیر نے تعلیم کے فروغ کے لیے ابراہیم حسن مراد کی کاوشوں اور وژن کی بھی تعریف کی۔